Penutupan Tahun Hidup Bakti Dekanat Tapanuli di Pangaribuan

Ari Sabtu – Minggu, 30-31 Januari 2016 na salpu nunga saut dipatupa Penutupan Tahun Hidup Bakti Denakat Tapanuli Keuskupan Sibolga maringanan di Aula St. Albertus – Pangaribuan. Torop do angka Pastor, Frater, Bruder nang Inanta suster na gabe parsidohot di ulaon on. Undangan khusus di pertemuan on ima angka ianakhonta parsingkola SMA Negeri Andam Dewi dohot SMK Negeri Barus Utara Kelas III.
Marragam do angka kegiatan na dipatupa di penutupan Tahun Hidup bakti on: Seminar taringot tu Hidup Bakti, Promosi Panggilan na pinatupa ni angka Ordo/Kongrasi na nadong di Keuskupan Sibolga, Sharing pengalaman sian pigapiga keluarga taringot tu pengalaman nasida di tonga ni keluarga taringot tu panjouon ni ianakhonna gabe sahalak parbiara dohot songon dia nasida manghilalahon parsaoran dohot angka Biarawan/ti di ngolu si ganup ari. Kegiatan on ditutup marhite ulaon Pelean Misa Nabadia na niuluhon ni Uskup Keuskupan Sibolga, Mgr. Dr. Ludovicus Simanullang OFM Cap. Anggiat ma kegiatan on gabe sada tingki na lehet di angka Pastor,Bruder, Frater dohot angka susterta laho mangarimangi huhut lam pahothon rohanasida laho mandalani panjouon ni Tuhan i saleleng ngoluna di taon on. Sai tubu ma angka panjaouon na imbaru sian tongatonga ni Hurianta marhite ungkap ni roha ni angka naposo bulungta laho mamillit dalan mangolu di bagasan hapolinon humongkop Harajaon ni Debata. Sai anggiat ma tutu.
Sosialisasi APP 2016 Paroki Pangaribuan

Maringanan  di Aula St. Albertus – Pangaribuan, dipatupa do Sosialisasi Bahan pendalaman APP 2016 tu sude perwakilan ni Stasi Saparoki Pangaribuan. 70 halak Panggula ni Huria sian 28 stasi na adong di Paroki Pangaribuan gabe parsidohot di kegiatan on. Stasi Sitiristiris ndang ro di bagasan kegiatan on. Pertemuan on diuluhon P. Dominikus Sibagariang OFM Cap. Di ombas sosialisasi on jumolo dipatorang tu angka peserta latar belakang ni bahan APP 2016 dungi diuduti dohot Simulasi Bahan Pendalaman APP mangihuthon partungkoanna (Partungkoan I – V). Marhite kegiatan Sosialisai Bahan APP 2016 di tingkat paroki on, boi ma annon angka Pangula ni Huria manguluhon ulaon Partangiangan APP di angka lingkungan di ganu stasi saleleng parhobason paska 2016 on.

Rapat Koordinasi Awal Tahun 2016:

Angka Vorhanger sian ganup stasi, anggota DPPI dohot Seksi-seksi na adong di Paroki Pangaribuan marpungu di ari Kamis, 18 Pebruari 2016 laho mangihuthon Kegiatan RAPAT KOODINASI  AWAL TAHUN 2016. Nang pe nunga tarlambat (Alana bahan baru pe sahat tu paroki di Minggu I Bln peb 2016), tongtong marsemangat angka Pangula ni Huria laho mangihuthon kegiatan on.

Di bagasan pertemuan on disagihon do MATRKIS KEGIATAN PAROKI  PANGARIBUAN 2016 naung disusun di tingki Evaluasi Akhir Tahun 2015 na salpu jala naung ditolopi Keuskupan. Marhite kegiatan on, diarahon ma sude Pangula ni Huria na adong di Paroki Pangaribuan on laho mananda saluhut kegiatan na naeng dipatupa saleleng Taon 2016 on. Anggiat ma marhite na mananda angka kegiatan on, sude pengurus boi rap manjaga jala mangulahonsa di tingki-tingki na mangihut.

Rapot  Pangaradeon Pesta Paska Ina Saparoki Pangaribuan

Mangihuthon Matriks Kegiatan Paroki Pangaribuan taon 2016, naeng marpesta  saparoki do angka ina di masa paska na ro on. Laho paradehon kegiatan on dijou do tu paroki dua halak pengurus ina sian ganup stasi laho marrapot rap dohot angka vorhanger dohot bendahara, di ari Minggu, 21 Pebruari 2016. Rapot na dipatupa di Aula St. Albertus Pangaribuan on mautushon, Pesta Paska Ina saparoki Pangaribuan dipatupa ari Minggu, 08 Mei 2016 Pkl. 09.00 WIB maringanan di Gareja Katolik St. Petrus – Bondarsihudon. Laos di bagasan rapot on  ditontuhon do angka kegiatan na naeng dipatupa di pesta paska i, susunan panitia pesta, biaya partisipasi peserta dohot iuran wajib ni Huria. Saluhut angka na ringkot laho paradeon tu Pesta Paska Ina Saparoki on hupatolhas hami di bagasan Notulen Khusus.

Rapot Pangaradeon Pesta Misa Pertama ni Dua Malim Naimbaru:

Ndang pola sadia leleng nari, Diakon Aris Adriano Malau OFM Cap  na mandalani mas diakonat di Paroki Pangaribuan rap dohot Diakon Anriadi  Tinambunan Pr na sian Stasi Pangaribuan (Lingkungan Siramiramian), naeng manjalo tohonan hamalimon. Dung sae manjalo tohonan hamalimon i, disangkapi parokinta do laho patupahon Pesta Misa Pertama ni 2 Pastor naimbaru i di parokinta on. Rapot Pengurus Saparoki di tanggal 21 Pebruari 2016 na salpu manolopi ulaon Pesta Misa Pertama i naeng dipatupa di Aula St. Albertus – Pangaribuan  di ari Minggu, 15 Mei 2016. Dung sae ditontuhon inganan dohot tanggal ni pesta I, ditorushon ma rapot I tu pembentukan panitia pesta, manontuhon iuran wajib dohot partisipasi ni ruas tu pesta misa pertama i.  Hasil keputusan rapat on salengkapna boi do tajaha muse di bagasan Notulen Khusus taringot tu Persiapan Pesta Misa I ni Dua Malim Naimbaru.

Rencana Panjaloon Komuni Pertama  Khusus Siswa SMP/SMA:

Songon na godang dope angka ianakhonta na singkola di SMP/SMA/SMK na so manjalo Komuni Pertama  sahat tu saonari. Mungkin boi do tasungkun: Boasa songon i? Ise do na hurang di si? Natuatua do manang Pengurus manang Paroki do na so manosoi?  Talului sandiri ma alus ni ragam sungkunsungkun i. Alai, apala na rumingkot saonari  ima ‘jalan keluar’ manang ’solusi’ do. Situasi on naeng dialusi marhite na naeng patupahon panjaloon Komuni Pertama Khusus tu angka parsingkola SMP/SMA/SMK. Ulaon Panjaloon Komuni Pertama Khusus on naeng dipatupa ma di ari Minggu, 03 April 2016 Pkl. 10.00 WIB maringanan di Stasi St. Maria Bukit Hasang. Angka Guru Agama di sude singkola SMP/SMA/SMK na adong di wilayah Paroki Pangaribuan nunga dipangido asa patupahon pangajarion khusus tu sude siswa na so manjalo Komuni Pertama on. Tu tingki na naeng ro, sude hita dipangido asa mamparrohahon angka ianakhonta, asa molo dung jumpang tingkina, naeng ma nunga dijalo nasida Komuni Pertama.

Rencana Panjaloon Sakramen Krisma tu angka Parsingkola:

Mangihuthon Agenda Pandalanan ni Amanta Uksup Keuskupan Sibolga, Mgr. Dr. Ludovicus Simanullang OFM Cap, naeng ro do nasida mangebati Paroki Pangaribuan laho patupahon Panjaloon Sakramen Krisma tu angka parsingkola SMP/SMA/SMK na adong di luatta on di ari Minggu, 24 April 2016 maringanan di Aula St. Albertus – Pangaribuan. . Sude guru agama saonari patupahon pangaradeon tu panjaloon Sakramen Krisma i.  Angka jadwal panopotion tu Panjaloon Sakramen Krisma on nunga hugurithon hami di bagasan daftar pardalanan ni Pastor mangebati stasi bulan April di bagian akhir ni majalah on.

Pesta Komuni Pertama Taon 2016:

Magihuthon Matriks Kegiatan Paroki Pangaribuan taon 2016 di bagian P9, adong rencana laho patupahon PANJALOON KOMUNI PERTAMA TU ANGKA DAKDANAK NA MARUMUR 11 TAON TU GINJANG.  Angka stasi na masuk di kegiatan on im: Batu Landit, Purbatua, Sanggesangge, Sampang Maruhur, Huta Jambu, Pahae Tongatonga, Huta Gugung, Aek Papan dohot Siantar Toruan.  Ulaon Panjaloon Komuni I on disangkapi dipatupa di Bulan 5 na ro on (jadwal nunga hupatomutomu hami di bagasan Barita Paroki on). Alani , mulai saonari, nunga boi be dibahen laporan tu katekis pendamping ni stasinta be, asa dipatupa pendaftaran dohot pangajarion tu angka dakdanak. Taparade ma kegiatan on sadenggan-dengganna, lumobi ma tu angka katekis asa patupahon pendampingan na denggan tu angka ianahonta on. Songon naung somal, biaya administrasi tu Komuni I ima Rp. 35.000,-. Biaya on dipasahat peserta tu katekis pendamping. Taringot ni pesta komuni pinasahat ma tu angka DPSI na adong di stasi i  laho patupahon pangaradeon.

Bulan Mei Bulan Rosario:

Di Hurianta digoari do Bulan Mei songon Bulan Rosario. Di bulan Mei (dohot Oktober) diarahon do hita ruas Katolik asa mer’devosi’ tu Inanta Maria marhite na mangulahon Tangiang Rosario. Taingot ma laho patupahon partangiangan Rosario saleleng bulan Mei on di tonga ni keluarganta sandiri (pribadi), di lingkungan suang songon i nang di stasinta be.

Pendaftaran Mahasiswa/I Baru STP Dian Mandala Gunungsitoli

Molo adong angka ianakhonta na naeng tamat SMA sederajat taon on manang naung tamat taon na salpu jala marhagiot naeong gabe sahalak KATEKIS  manang Guru Agama,  terbuka do kesempatan di nasida angka na berminat menguduti singkolana tu Sekolah Tinggi Pastoral DIAN MANDALA  Gunungsitoli di Nias. Di son hupatomutomu hami ma angka na ringkot tu urusan pendafatran calom mahasiswa/I baru T.A. 2016/2017:

a.     Berkas:

·        Mamboan Surat Rekomendasi sian Pastor Paroki (1 lembar)

·        Surat Pandidion na pinaimbaru (Taon 2016) salembar (asli) dohot fotocopy 5 lembar

·        Fotocopy Izajah manang SKHUN SMA/SMK sederajat naung dilegalisir

·        Paspoto naimbaru ukuran:  4 x 6 cm (warna) = 5 lembar, 3 x 4 cm (warna) = 5 lembar, 2 x 3 cm (warna (5 lembar)

·        Surat hatorangan sian dokter na patoranghon taringot tu   kesehatan ni calon mahasiswa

·        Mangisi formulir pendaftaran di tingki pendaftaran i

b.     Biaya Administrasi:

·        Pendaftaran                        Rp.       150.000,-

·        Testing                               Rp.       125.000,-

·        Ordik                                  Rp.       200.000,-

·        Sarana Pendidikan              Rp        400.000,-

·        Registrasi Semenester         Rp.          80.000,-

·        Uang kuliah / semester        Rp.     1. 100.000,-

·        NIRM                                 Rp.           15.000,-

·        KTM                                  Rp.           10.000,-

·        Jas Almamater                    Rp.         300.000,-

·        Perpustakaan                      Rp.           30.000,-

·        Iuran Pangkal SEMA          Rp.           75.000,-

·        Iuran Sema / semester         Rp.           25.000,-

Jumlah sude                             Rp     . 2.510.000,-

c.      Tingki  & Inganan  Pendaftaran:

·        Ombas ni pendaftaran ima sian tanggal 16 Mei – 27 Juli 2016

·        Inganan Pendaftaran ima di BKAA  STP Dian Mandala Gungsitoli, ganup  ari di tanggal na ditontuhon i: Pagi (Pkl. 09.00 – 11.30 WIB) jala Sore (Pkl. 15.00 – 17.00 WIB)

d.     Jadwal  Testing: 

Tu angka naung lulus seleksi berkas, baru pe asa boi mambuat Kartu Testing di tanggal 27-28 Juli 2016 mulai Pkl 09.00 – 12.00 WIB. Testing sandiri dipatupa tanggal 28 – 29 Juli 2016. Angka peserta mamangke pahean Putih-Hitam (celana panjang na birong tu peserta baoa jala rok na birong tu boruboru).

Angka Setoran ni Huria/Stasi tu Paroki

·       Kolekte Parjolo:

Nunga leleng adong kesepakatan di parokinta on, asa stasi-stasi patupahon setoran Kolekte I sahali di bagasan tolu bulan manang di tingki ro pastor mangebati stasi. Saonari hita nunga di bulan Maret 2016 jala torop so piga dope na patupahon penyetoran Kolekte Pertama on. Nian sian taontaon na salpu, nunga songon na denggan system penyetoran na dipatupa angka stasi, nang pe sai adong sada manang dua stasi na lemba taringot tu si. Alani i, pangidoannami,  asa lam tatingkathon ma nian hadengganon naung tausahahon saleleng on.  Taingot  ma patupahon penyetoran Kolekte I di tingkina.

·       Iuran Wajib Tahunan Keluarga:

Saonari hita nunga bongot tu bulan Maret 2016. Taingot ma laho patupahon pembayaran Iuran Wajib Tahunan Keluarga (najolo goarna didok: eme Gotilon). Balga ni Iuran Wajib Tahunan on ima Rp. 100.000,-. Pembagianna: Rp. 60.000,-  (Eme Gotilon), Rp. 20.000,- (DPK) jala Rp. 20.000,- (DPP).  Di bagasan pos ni roha dohot serep ni roha dipangido tu sude keluarga na adong di stasi, asa rade patupahon Iuran Wajib Tahunan on. Molo so boi langsung dilunasi, boi dipatupa secara angsuran. Rade do angka pengurus di stasi laho manjalo angsuran na sian keluarga. Di taon 2015 na salpu, nunga godang nian kemajuan ni angka stasi taringot tu Iuran Wajib Tahunan Keluarga on. Alai di pigapiga stasi, tung mansai borat jala maol dope roha nasida patupahon setoran Iuran Wajib on. Marhite barita on pinabotohon tu hita saluhutna: Batas akhir pelunasan Iuran Wajib Tahunan Keluarga on ima Minggu IV Bulan Agustus 2016. Mangido hami sian Paroki, unang ma nian tapaima sahat tu batas akhir. Tausahahon ma patupahon angka kewajibanta tu Huria sahatophatopna. Di si do patar jala tarida songon dia panghophoponta tu Huria ni Tuhan i.

·       Dana Solidaritas Petugas Pastoral: Di taon 2016 on songon na ‘sepi’ dope penyetoran ni dana solidaritas . Gariada, adong dope pigapiga stasi nari na so patupahon setoran sian taon-taon na salpu. Kesepakatan  di hita ima asa ganup bulan stasi patupahon setoran dana solidaritas i.

·       Dana Katekis: Sahat tu bulan Maret 2016 on holan piga stasi dope na patupahon penyetoran dana katekis. Asa unang gabe ‘menumpuk’ tagihan ni paroki tu stasinta, molo jumpang bulan pintor tapasahat ma angka kewajibanta, manang pintor tabayar ma tolu manang piga-piga bulan tu jolo, asa unang sai repot hita laho patupahon pelunasan ni kewajibanta tu paroki.

Angka Biaya Administrasi:

Dison dipabotohon tu hita ragam ni biaya administrasi na dipamasa di Paroki Pangaribuan taretong mulai sian tgl 01 Januari 2016:

·       Administrasi Pandidion/Terima resmi: Rp. 45.000,- / halak

·       Administrasi Pamasumasuon (Nabaru): Rp. 300.000,-

·       Administrasi Pamasumasuon Hajagaron (Convalidatio): Rp. 200.000,-

·       Adminsitrasi Komuni I: Rp. 35.000,- / halak

·       Administrasi Krisma: Rp. 35.000,- / halak

·       Mangurus/Mangganti Surat-surat: Rp. 20.000,- / lembar

·       Administrasi Kursus Perkawinan: Rp. 50.000,- / halak manang Rp. 100.000,- / Pasang.

Sude Biaya Administrasi na ringkot laho manjalo angka Sakramen  (Pandidion/T.Resmi, Pamasumasuon & Convalidatio, Komuni I , Krisma) asa dipaberes di Sekretariat Paroki andorang so jumpang ombas ni panjaloon ni Sakramen i (maksudna: Unang ma dipasahat tu pastor di tingki hari H).