BARITA PAROKI ST. FRANSISKUS ASSISI PANGARIBUAN No. 01/ Pebruari - Maret/XXXIII/2017

HATA PATUJOLO

           

Horas ma di hita saluhutna. Naeng masuk ma hita tu Bulan Pebruari 2017. Ndang sadia leleng nari, naeng masuk ma hita tu masa Parhobason Paska. Di bagasan edisi parjolo di taon 2017 on, ro hami sian paroki laho pasahathon angka informasi na ringkot taringot tu angka ragam ni ulaon naung taulahon di tingki na salpu jala patotahon angka ulaon na naeng taulahon di bulan-bulan na naeng ro.

Molo dung sahat tu hita Barita Paroki on, denggan ma tajaha isina manang pigapiga hali, asa antus di hita angka na ringkot ulahononta. Lumobi ma asa tutu taparrohahon angka jadwal kegiatan di paroki, rayon dohot kunjungan ni Pastor tu Hurianta be, lumobi di Masa Prapaska na naeng ro. HORAS…..


 Angka Naporlu Botoon

a.    Pesta Perak Hidup Membiara:

Ari Kamis, 08 Desember 2016 na salpu, Sr. Mikaela Hutagaol  FCJM  mangareahon Pesta Perak 25 Taon Hidup Membiara  . Stasi asal ni susterta on ima Stasi St. Yosep – Onan Handis.  Tatangianghon asa anggiat tongtong hot nasida saleleng mangolu laho mangihuthon panjouon na sian Tuhan i. Anggiat ma tu joloan on, tongtong diungkap Tuhan i roha ni angka  naposo bulung ni Hurianta laho mangalusi panjouonNa, mangolu di bagasan haunduhon, hapogoson dohot hapolinon.

b.   Pangurupion tu Stasi Bukit Patupangan:

Di ombas Evaluasi Akhir Tahun 2016 di bulan Oktober na salpu nunga satahi hita na saparoki on laho patupahon pangurupion tu rencana pembangunan gareja baru di Stasi Bukit Patupangan. Pangurupuion i ima marrupahon dana Rp. 20.000,- / KK. Las roha molo adong ruas manang keluarga na rade pasahathon lobi sian na ditontuhon. Laos di tingki i, dibahen do batas waktu penyetoran bantuan ima Bulan Desember 2016 – Pebruari 2017. Sahat tu saonari on, torop so piga dope stasi naung mulai pasahathon bantuan i. Alani i, marhite Barita Paroki on hupangido hami tu hita saluhutna, asa taingot ma laho papunguhon bantuan i di stasinta. Molo nunga adong dana na masuk sian ruas, pintor tapasahat ma tu paroki asa boi dipamasuk muse data i tu website ni parokinta.

c.    Natal OMK Rayon II:

Ari Rabu, 28 Desember 2016 na salpu, nunga dipatupa ulaon pesta Natal OMK Rayon II maringanan di Stasi St. Lukas Aek Dakka. Ulaon on dipungka marhite Pelean Misa naiuluhon ni P. Dominikus Sibagariang OFM Cap. Dung sae Pelean Misa, sude na ro di pesta on rampak marsipanganon. Dung sae marsipanganon, acara ditorushon dohot kata sambutan na diselingi dohot angka hiburan. Ndang pola adong ditampilhon ayat-ayat natal di ombas pesta natal on. Nang pe ndang pola sadia torop peserta, alai ganup stasi na adong di rayon II lengkap do utusanna. Tamba marsemangat pesta on, ala rade jala renta do luhut ruas ni Stasi St. Lukas Aek Dakka gabe parsidohot jala patuduhon partisipasi nasida di pesta las ni roha on. Mauliate ma di sude dongan naung marlojaloja laho paradehon pesta on, gabe boi mardalan denggan hombar tu na disangkapi sian mulana. Anggiat ma las ni roha di Pesta Natal OMK  patubuhon sada semangat naimbaru, tarlumobi ma di tongatonga ni angka naposo bulung na adong di Rayon II.

d.   Natal Ama Lintas Rayon:

Angka Ama na sian 8 Stasi (Sanggesangge, AekGapuk, Onan Handis, Bondarsihudon, Panguhalan Rihit, Bukit Hasang, Batu Landit dohot Purbatua) marpungu jala rap marlas ni roha di bagasan ulaon Pesta Natal Ama Lintas Rayon na dipatupa di ari Kamis, 29 Desember 2016 na salpu maringanan di Stasi St Maria – Bukit Hasang. Ulaon on dipungka marhite Pelean Misa na niuluhon ni P. Yoseph Sinaga OFM Cap. Ragam ni ulaon na dipatupa dung sae Pelean Misa di ombas on: Makan bersama, Ayat-ayat Natal, Angka kata sambutan na diselingi hiburan dohot undian berhadiah/door prize. Luhut ulaon on dipatupa laho patuduhon hasadaon dohot las ni roha di tonga ni angka ama. Anggiat ma sude ulaon na dipatupa di pesta natal on tutu manubuhon las ni roha, hasadaon, tarlumobi ma haringgason di angka ama laho padimundimunhon ngolu parhuriaon.

e.    Silua Natal  2016:

Songon na somal ganup jumpa pesta natal huhut songon sosososo naung hupasahat hami sian paroki marhite surat edaran khusus, ganup stasi nunga pasahathon SILUA NATAL 2016.

f.    Prosesi Tiga Raja Taon 2017:

Ari Minggu, 08 Januari 2017 ima Ari Rea Efifani (Hapapatar ni Tuhan). Laos sadari i do tong na ginoaran HARI ANAK MISIONER SEDUNIA.  Di ombas on dipatupa do Kegiatan PROSESI TIGA RAJA  di sude stasi na adong di Paroki Pangaribuan on. Di bagasan taon 2017 on, kegiatan Prosesi Tiga Raja dipatupa di 27 Stasi. Stasi na so mangulahonsa di 2017 on ima: Aek Badan, Barungbarung dohot Huta Gugung. Sude stasi on adong di Rayon I. Di bagasan ulaon Prosesi Tiga Raja on, angka dakdanak sekami ro manopot jabu ni angka ruas huhut mamboan tangiang tu sude pangisi ni jabu na tinopot nasida. Mauliate ma di sude stasi naung botul marlojaloja laho mangajari jala mandongana angka sekami din a laho mangulahon kegiatan Prosesi Tiga Raja on. 
Kegiatan Prosesi Tiga Raja di Paroki Pangaribuan di taon 2017 tongtong do diperlombahon. Angka na ringkot songon penilaian di perlombaan on ima: Pahean ni Petugas Prosesi, Kreasi Kotak Derma dohot Torop ni kunjungan (jumlah KK na dikunjungi). Angka Juara ni Lomba Prosesi Tiga Raja 2017 ima:

Juara I    : Sekami Stasi Bukit Patupangan

Juara II   : Sekami Stasi St. Yosep – Onan Handis

Juara III  : Sekami Stasi St. Theresia - Sijungkang

Juara IV  : Sekami Stasi St. Lukas – Aek Dakka

Juara V   : Sekami Stasi St. Petrus – Pahae Tongatonga

Juara VI  : Sekami Stasi St.  Paulus – Siantar Toruan

g.  Natal Pengurus Separoki: Jumat, 13 Januari 2017

Maringanan di Aula St. Albertus – Pangaribuan, nunga saut dipatupa Pesta Natal ni Pangula ni Huria Saparoki Pangaribuan di ari Jumat, 13 Januari 2017.  Di bagasan kegiatan on tongtong do digokhon sude Pendamping Sekami  sian stasi-stasi. Nasida pe tongtong taretong songon ‘Petugas Pastoral’ , ala parsidohot do nasida mngurus Huria marhite na mangajari jala ‘mendamping’ angka dakdanak sekami di stasina be.

Nang pe nunga masuk tu tingki nasomal, alai angka panjahaon dohot angka ende tong dope dibuat sian Ari Rea Natal.  Kegiatan makan bersama dipatupa di aula dung sae ulaon Pelean Misa nabadia. Di tingki ramah tamah, dijou do pigapiga vorhanger laho pasahathon pengalaman nasida sebagai Pangula ni Huria. Godang hamaolon dohot parungkilon na diadopi nasida songon sahalak Pangula ni Huria. Nang pe songoni, ndang mandele jala ndang mansadi nasida laho mangulahon ulaonna laho mangurus Huria i. Mauliate ma di sude Pangula ni Huria, na tongtong so marnaloja laho padimundimunhon Huria di ganup stasi. Songon tanda hamauliateon, paroki pasahathon sada hadiah sederhana tu sude Pangula ni Huria dohot Pendamping Sekami.  Andorang so dipasimpul ulaon Pesta Natal Pengurus on, dipasahat paroki do ‘apresiasi’ tu stasi-stasi na patupahon setoran Iuran Wajib Tahunan Keluarga tepat waktu. Dua stasi na mandapot hadiah penghargaan sian paroki ima Stasi St. Paulus – Sawah Lamo dohot Stasi St. Yosep – Onan Handis. Anggiat ma tu taon-taon na mangihut angka stasi na asing pe lam marsemangat jala marsiadu laho patupahon penyetoran Iuran Wajib Keluarga on tepat waktu.

h.  Angka Rencana Kegiatan:

1)   Pertemuan Pendamping Sekami Separoki :

     Ari Kamis- Sabtu, 19-21 Januari 2017 naeng dipatupa do Pelatihan Pendamping Sekami Separoki Pangaribuan maringanan di Aula St. Albertus – Pangaribuan.

2)   Rapat Koordinasi Awal Tahun 2017:

     Ari Jumat, 27 Januari 2017, Pkl. 13.30 – 17.00 WIB naeng dipatupa do ulaon Rapat Koordinasi Awal Tahun 2017 maringanan di Aula St. Albertus – Pangaribuan. Na digokhon tu pertemuan on ima: Sude Vorhanger, sude anggota DPPI dohot angka pengurus Seksi na adong di paroki.

3)   Masa Parhobason Paska 2017:

     Parhobason Paska dimulai toho di Ari Rabu, 01 Maret 2017 (REBO ORBUK).  Saleleng masa Parhobason Paska ndang adong ulaon Pamasumasuon Pardongansaripeon jala angka ulaon pesta adat pe asa tapasiding saleleng parpuasaon on.  Ulaon Pamasumasuon baru pe asa dipatupa mulai tanggal 18 April 2017. Tabaen ma tingting di stasinta ganup ari Minggu, asa sude ruas parsiboto taringot tu aturan on.

4)   Ibadat Tobat 2017:

     Songon na somal, di ombas parhobason paska taon on tongtong do naeng dipatupa ulaon IBADAT TOBAT di sude stasi dohot di angka singkola na somal patupahon pelean misa ganup bulan. Jadwal nunga hupatomutomu hami di bagasan Barita Paroki on.

i.   Angka Setoran ni Huria/Stasi tu Paroki

     1)    Kolekte Parjolo:  Nunga leleng adong kesepakatan di parokinta on, asa stasi-stasi patupahon setoran Kolekte I sahali di    bagasan tolu bulan manang di tingki ro pastor mangebati stasi. Taingot ma pasahathon setoran Kolekte I on di tingkina. Tangkas ma tabahen jumlah ni kolekte i per minggu di bagasan sabulan.

2)   Iuran Wajib Tahunan Keluarga: Saonari hita nunga bongot tu bona ni taon 2017. Taingot ma laho patupahon pembayaran Iuran Wajib Tahunan Keluarga (najolo goarna didok: eme Gotilon). Balga ni Iuran Wajib Tahunan on ima Rp. 100.000,-. Pembagianna: Rp. 60.000,-  (Eme Gotilon), Rp. 20.000,- (DPK) jala Rp. 20.000,- (DPP).  Di bagasan pos ni roha dohot serep ni roha dipangido tu sude keluarga na adong di stasi, asa rade patupahon Iuran Wajib Tahunan on. Molo so boi langsung dilunasi, boi dipatupa secara angsuran. Rade do angka pengurus di stasi laho manjalo angsuran na sian keluarga. Marhite barita on pinabotohon tu hita saluhutna: Batas akhir pelunasan Iuran Wajib Tahunan Keluarga on ima Minggu IV Bulan Agustus 2017. 

3)  Dana Solidaritas Petugas Pastoral: Songon na adong dope stasi na so menyetor dana solidaritas  untuk periode 2016. Mungkin, adong dope  stasi  na so patupahon setoran sian taon-taon na salpu. Kesepakatan  di hita ima: ganup bulan stasi patupahon setoran dana solidaritas.  

4)  Dana Katekis:  Sarupa tu dana solidaritas, tong dope adong stasi na so  patupahon penyetoran dana katekis. Asa unang gabe ‘menumpuk’ tagihan ni paroki tu stasinta, molo jumpang bulan pintor tapasahat ma angka kewajibanta, manang pintor tabayar ma tolu manang piga-piga bulan tu jolo, asa unang sai repot hita laho patupahon pelunasan ni kewajibanta tu paroki.