BARITA PAROKI PAROKI ST. FRANSISKUS ASSISI PANGARIBUAN No. 02/ April - Mei /XXXII/2017

HATA PATUJOLO

Horas ma di hita saluhutna. Nunga masuk hita saonari tu Ombas Parhobason Paska. Di bagasan suasana manomu Pesta Paska, ro hami sian paroki laho pasahathon angka informasi na ringkot taringot tu angka ragam ni ulaon naung taulahon di tingki na salpu jala pabotohon angka ulaon na naeng taulahon di bulan-bulan na naeng ro.

Hupangido hami asa idenggan ma tajaha isi ni Barita Paroki onmanang pigapiga hali, asa tangkas di hita angka na ringkot ulahononta. Lumobi ma asa tutu taparrohahon angka jadwal kegiatan di paroki, rayon dohot kunjungan ni Pastor tu Hurianta be.              

Angka Naporlu Botoon

a.     Pertemuan Pendamping Sekami Paroki Pangaribuan:

Maringanan di Aula St. Albertus Pangaribuan, nunga saut dipatupa ulaon Pelatihan Pendamping Sekami Separoki Pangaribuan di ari Kamis- Sabtu, 19-21 Januari 2017. Pembinaan on diuluhon Dirdios KKI Keuskupan Sibolga, Sr. M. Dominika Nababan OSF.   Adong 67 halak pendamping sekami na parsidohot di bagasan pelatihan on sian 27 stasi. Stasi na so ro di bagasan pelatihan on ima Pananggahan dohot Siantar Toruan. Godangan do pendamping sekami na ro sian stasi on angka naimbaru martugas dope. Ido Alana di ombas pelatihan on dipatomutomu  simulasi parhaladoon tu anak sekami dohot latihan lagu & gerak, asa lam diantusi nasida  songon dia manguluhon Minggu Gembira i.

      Marhite pelatihan on anggiat ma lam tamba pangantusion, parbinotoan dohot pengalaman ni angka pendamping sekami on, asa lam tu dengganna nasida  laho patupahon mangajari angka ianakhonta di stasina be. 

b.     Rapat Koordinasi Awal Tahun 2017:

Angka Vorhanger sian ganup stasi, anggota DPPI dohot Seksi-seksi na adong di Paroki Pangaribuan marpungu di ari Jumat, 27 Januari 2017 laho mangihuthon Kegiatan RAPAT KOODINASI  AWAL TAHUN 2017.

Di bagasan pertemuan on disagihon do MATRKIS KEGIATAN PAROKI  PANGARIBUAN 2017 naung disusun di tingki Evaluasi Akhir Tahun 2016 na salpu jala naung ditolopi Keuskupan. Marhite kegiatan on, diarahon ma sude Pangula ni Huria na adong di Paroki Pangaribuan on (PP Lingkungan, Stasi, Angka seksi di paroki dohot DPPI) laho mananda saluhut kegiatan na naeng dipatupa saleleng Taon 2017 on. Anggiat ma marhite na mananda angka kegiatan on, sude pengurus boi rap manjaga jala mangulahonsa di tingki-tingki na mangihut, hombar tu naung ditontuhon di bagasan matriks kegiatan i.

c.     Sosialisasi APP 2017 Paroki Pangaribuan

Maringanan  di Aula St. Albertus – Pangaribuan, dipatupa do Sosialisasi Bahan pendalaman APP 2017 tu sude perwakilan ni Stasi Saparoki Pangaribuan toho ma i ari Kamis, 23 Pebruari 2017. 56 halak Panggula ni Huria sian 21 stasi na adong di Paroki Pangaribuan gabe parsidohot di kegiatan on. Stasi na so ro di bagasan kegiatan on ima: Pananggahan, Purbatua, Batu landit, Bonan Dolok, Sijungkang, Aek Gapuk, Ladang Baru dohot Sampang Maruhur. Pertemuan on diuluhon Amanta E. Simanullang (Bukit Hasang) dohot J. Simanullang (Sijungkang). Di ombas sosialisasi on jumolo dipatorang tu angka peserta latar belakang ni bahan APP 2017 dungi diuduti dohot Simulasi Bahan Pendalaman APP mangihuthon partungkoanna (Partungkoan I – V). Marhite kegiatan Sosialisai Bahan APP 2017 di tingkat paroki on, boi ma annon angka Pangula ni Huria manguluhon ulaon Partangiangan APP di angka lingkungan di ganup stasi saleleng parhobason paska 2017 on. Laos di ombas on do disagihon celengan tu ganup stasi, na naeng pangkeon ni ganup KK laho patupahon aksi puasana be di parhobason paska on.

d.     Rapot  Pangaradeon Panjaloon Krisma di Rayon III:

Mangihuthon Agenda Pandalanan ni Amanta Uksup Keuskupan Sibolga, Mgr. Dr. Ludovicus Simanullang OFM Cap, naeng ro do nasida mangebati Paroki Pangaribuan laho patupahon Panjaloon Sakramen Krisma tu angka ruas na dong di rayon III toho di ari Kamis, 25 Mei 2017 maringanan di Stasi St. Martinus – Pangihit. 

Laos ari Minggu 05 Maret 2017 na salpu, nunga dipatupa  Rapat Pangaradeon tu ulaon Panjaloon Krisma di Rayon III on. Di bagasan rapot na dipatupa di Stasi Panguhalan Rihit on nunga disusun kepanitiaan ni kegiatan dohot anggaran dana ni kegiatan on.  Notulen Rapot nunga ditongos tu stasi-stasi na adong di rayon III.

e.     Partangiangan Dalan Silang dohot Partangiangan APP di Masa Prapaska

Ganup taon do ro jala tabolus ombas Prapaska. Songon na somal, adong dua ulaon na ‘rutin’ taulahon di masa parhobason paska on di stasi nang lingkungan  ima: Partangiangan Dalam Silang dohot Partangiangan APP. Ganup ari Jumat saleleng parhobason paska diarahon do hita laho pahusorhusorhon sitaonon ni Tuhanta Jesus Kristus di bagasan ulaon Partangiangan Dalan Silang. Dung i muse, di ganup lingkungan dipatupa do Partangiangan APP sahali saminggu. Nunga diparade bahan pendalaman na naeng pangkeonta di ganup lingkungan saleleng masa parhobason paska on. Marhite angka ulaon on, diharophon lam tangkas di hita impola ni Masa Parhobason Paska songon  tingki laho mangarimangi pangalaho na hurang denggan laos paubahon roha huhut marusaha laho patupahon angka ulaon na hombar tu na hinalomohon ni roha ni Debata.  

f.     Pangaradeon tu Panjaloon  Komuni Pertama Taon 2017:

Hombar tu naung digurithon di Matriks Kegiatan Paroki 2017, Panjaloon Komuni Pertama naeng dipatupa di Stasi Bukit Patupangan, Barus, Pananggahan dohot Bondarsihudon. Alani i, dipangido tu angka pengurus di stasi na opat on asa mulai patupahon pendaftaran peserta komuni pertama jala mambahen komunikasi tu katekis pendamping stasi, asa adong haradeon nasida patupahon pangajarion. Songon naung ditintuhon, ianakhonta na naeng parsihot manjalo Komuni Pertama on nunga marumur gonp 11 taon jala nunga tardidi /dijalo resmi di Huria Katolik. Pendaftaran dijalo pengurus marhite na papunguhon surat pandidion ni angka ianakhonta calon peserta komuni pertama i. Biaya administrasi tu panjaloon Komuni Pertama ima Rp. 35.000,- / halak. Biaya administrasi on dipasahat tu Pangajari/katekis. Ulaon Panjaloon Komuni Pertama on dipatupa toho di Ari Rea Daging dohot Mudar ni Kristus, Ari Minggu,  18 Juni 2017. 

g.     Rekoleksi Pendamping Sekami Dekanat Tapanuli

Naeng dipatupa do kegiatan Rekoleksi Pendamping Sekami Dekanat Tapanuli, maringanan di Aula St. Albertus Pangaribuan di ari Sabtu-Minggu, 06-07 Mei 2017 na naeng ro. Penanggungjawab ni kegiatan on ima Biro KKI Keuskupan Sibolga. Alani i sian paroki mangidohon dohot gomos, asa sude Pendamping Sekami na sian stasinta parsidohot di kegiatan Rekoleksi on. Angka na ringkot diparade taringot tu kegiatan on, hupatomutomu hami marhite surat undangan khusus.

h.     Bulan Mei Bulan Rosario:

Di Hurianta digoari do Bulan Mei songon Bulan Rosario. Di bulan Mei (dohot Oktober) diarahon do hita ruas Katolik asa mar’devosi’ tu Inanta Maria marhite na mangulahon Tangiang Rosario. Taingot ma laho patupahon partangiangan Rosario saleleng bulan Mei on di tonga ni keluarganta sandiri (pribadi), di lingkungan suang songon i nang di stasinta be.